-- ADVERTISEMENT --

Nagpabilin ang pagsalig ni Defense Secretary Gilberto Teodoro Jr. nga tumanon sang Estados Unidos ang iya obligasyon sa Pilipinas kon maglala ang tensyon kag magresulta sa seryoso nga krisis sa West Philippine Sea.

Apang ginpahayag ni Teodoro nga importante nga magpabilin nga kalmado ang Pilipinas kag likawan ang mga tikang nga mahimo magpasanyog sang komprontasyon.

Ginpabug-atan man niya nga dapat magpadayon ang pungsod sa pagtinguha nga masolbar ang territorial dispute paagi sa malinong nga pamaagi.

Dugang pa sang kalihim, magapabilin ang commitment sang Estados Unidos sa pagbulig sa Pilipinas, luwas kon may pagbag-o sa United Nations Convention on the Law of the Sea (UNCLOS).

Samtang, nagapati si Teodoro nga mahimo malikawan ang armado nga komprontasyon sa China paagi sa pagpakalma sang sitwasyon kag pagbinuligay sang Pilipinas kag sang mga alyado sini.

Ginhimo sang opisyal ang pahayag kadungan sang ika-10 nga anibersaryo sang 2016 arbitral ruling nga nagdaog ang Pilipinas batok sa China sa kaso may kaangtanan sa West Philippine Sea.