Ginpanginwala sang Moro National Liberation Front (MNLF) ang mga alegasyon nga ginahatagan nila sang proteksyon si Senador Ronald “Bato” dela Rosa nga ginatudlo nga nagapanago sa isa ka armado nga grupo sa Mindanao.
Sa Ginpahayag sang organisasyon nga wala sang pormal nga relasyon bilang grupo sa senador kag wala man sang napamatud-an nga ebidensya nga miyembro ini ukon kaalyado sang ila armado nga pwersa.
Ginpaklaro sang MNLF nga ang pagpakig-angot ni Dela Rosa sa ila organisasyon nagatuhoy lamang sa mga polisiya kag inisyatibo sa pagpalig-on sang kalinong, lakip na ang integrasyon sang mga miyembro sang MNLF kag Moro Islamic Liberation Front (MILF) sa Philippine National Police (PNP) kag Armed Forces of the Philippines (AFP).
Ginpahayag man sang grupo nga ang mga report nahanungod sa posible nga pagpanalipod nila sa senador mga espekulasyon lamang, bisan pa may yara sang personal kag politikal nga koneksyon si Dela Rosa kay MNLF founder Nur Misuari paagi kay anay Presidente Rodrigo Duterte.
Dugang pa sang organisasyon, nabahin-bahin na ang ila grupo sa subong, gani wala sang kasiguruhan kun may kapasidad ukon intensyon ang kampo ni Misuari nga magpugong sa posible nga pag-arestar sa senador.
Sa pihak sini, gin-insister sang MNLF nga wala sila sang napamatud-an nga impormasyon nga nagakabit kay Dela Rosa sa ila armado nga organisasyon ukon nagapakita nga yara ini sa ila proteksyon.
