Ginpaathag sang lokal nga gobyerno sang Koronadal nga ang pagpatuman sang Night Market Ordinance antes sang Charter Anniversary indi nagakahulugan nga ginpauntat ang pangabuhian sang mga vendors, kundi kabahin ini sang pag-organisar kag pagplastar sang ila mga baligyaan.
Sa interview sang Bombo Radyo Koronadal kay Marloun Gumbao, Koronadal City Treasurer, ginpahayag niya nga madugay na nga yara ang ordinansa kag nag-agi ini sa maid-id nga proseso antes ginpatuman.
Suno kay Gumbao, may ginapatuman nga bayad nga P10 kada square meter kada adlaw para sa paggamit sang espasyo sang mga vendors, suno sa Local Revenue Code Ordinance sang syudad.
Ginpaathag man niya nga ang mga gamit nga ginpangumpiskar amo ang mga nabilin sang mga vendors nga wala na nakuha ukon nahimos sang ila tag-iya. Gin-athag niya nga wala ginatuyo sang lokal nga gobyerno nga untaton ang ila pangabuhian, kundi siguruhon nga organisado ang mga baligyaan kag hapsay ang paggamit sang mga espasyo.
Samtang, ginpat-od ni Gumbao nga may tatlo ka ginatalana nga lugar para sa mga vendors nga ginbalhin. Lakip diri ang Gensan Drive, nga ginatalana para sa mga nagabaligya sang arroz caldo, pastil, balut kag kape; Sueno Corner; kag ang lugar sa atubang sang SPDA.
Dugang pa sang city treasurer, kinahanglan mag-adjust ang mga vendors sa ila bag-o nga mga pwesto. Ginpahayag niya nga ang ini nga tikang kabahin sang paninguha sang lokal nga gobyerno nga mas mapaayo ang pag-organisar sang mga baligyaan kag mapanami ang palibot sang Koronadal City antes sang Charter Anniversary.
