KORONADAL CITY – Nagpalab-ot sang ila nga pagkadismaya kag kalain sang buot ang pila ka mga lokal nga vendors nga naapektuhan sang demolition sa bahin sang Gensan Drive kag Alunan Avenue sa siyudad sang Koronadal.
Sa ginpalab-ot sang nagkalainlain nga mga vendors, bangud sa pagpang-guba sang ila nga mga pwesto kag pagpabalhin sa ila sa bag-o nga lokasyon sang night market kun diin suno sa ila, nagnubo ang ila baligya kon ikumparar sang una sila nagabaligya sa atubang sang SMRAA Complex kag sa Gensan Drive.
Suno sa pila ka food vendors, dako ang epekto sang pagbalhin sa ila pangabuhi bangud ang ila adlaw-adlaw nga baligya amo ang ila ginasaligan para sa mga kinahanglanon sang ila pamilya kag pagbayad sang mga obligasyon.
May mga baligya pa gani suno sa ila nga naguba ukon napan-os bangud sa kakulang sang mga customer gani nagakalugi sila.
May pila man ka vendors nga nagpahayag sang kasubo bangud sa pagpatuman sang demolition, nga suno sa ila, wala sila nahatagan sang bastante nga tion agud makapreparar kag makabawi sa ila mga gin-utangan kag kapital.
Bangud sini, nagpalab-ot sila sang panawagan nga konsiderahon ang ila sitwasyon, ilabi na nga ang ila ginapangita lamang amo ang padayon nga pagpangabuhi paagi sa pagbaligya.
Samtang, sa interview sang Bombo Radyo Koronadal kay Mayor Erlinda Araquil, ginpahayag sini nga bukas siya sa mga vendors nga naapektuhan sang demolition kag handa ang lokal nga gobyerno nga magbulig sa ila.
Ginpaklaro man sang alkalde nga mahimo magsaylo sa Night Market kag sa duha pa ka area nga gintalana para sa mga apektado nga vendors agud makapadayon sila sa ila nga pangabuhian.
Kaangpot sini, nagalaum ang mga vendors nga ang ila pagpalab-ot sang reklamo ang mangin balasehan sang LGU Koronadal nga makapangita sang solusyon nga makabalanse sa pagpatuman sang mga patakaran sang siyudad kag sa panginahanglanon sang mga nagasalig sa pagbaligya para sa ila adlaw-adlaw nga pangabuhi.
