KORONADAL CITY – Boluntaryo nga nagsungka sa kapulisan ang isa ka Sangguniang Kabataan (SK) Chairman sa syudad sang Koronadal matapos makuhaan sang video sa akto nga naga-pot session ukon nagagamit sang ilegal nga droga.
Ini ang ginkumpirmar ni Police Lieutenant Colonel Harold Cornel, hepe sang Koronadal City Police Station sa interview sang Bombo Radyo Koronadal.
Suno kay Cornel, ang amo nga SK Chairman nga ginakabig subong nga High Value Individual (HVI), ang nagsungka sa Koronadal City PNP kaupod ang live-in partner, utod sini kag Barangay Kapitan sang ila lugar.
Nahibaluan nga antes pa man ang pagsungka, yara na ini sa idalom sang surveillance sang mga kapulisan kag natalana nga dakpon paagi sa anti-illegal drug operation batok sa iya.
Gilayon naman ini nga ginpaidalom sa profiling, booking procedures, de-briefing, kag iban pa nga documentary purposes.
Ginpaidalom man ini sa drug test agud mapasulod sa Community-Based Drug Rehabilitation Program (CBDRP) nga ginapangasiwaan sang Barangay Anti-Drug Abuse Council (BADAC) kag City Anti-Drug Abuse Council (CADAC).
Apisar pa nga nagsungka kag magapaidalom sa rehabilitasyon, gin-athag sang mga awtoridad nga magapangatubang gihapon ang amo nga opisyal sang pormal nga mga kaso:
Kaso nga Kriminal: Paglapas sa Republic Act 9165 ukon ang Comprehensive Dangerous Drugs Act of 2002 (partikular na ang Sec. 15 para sa paggamit sang ilegal nga druga).
Kaso Administratibo: Grave Misconduct nga may penalidad nga pagpahalin sa posisyon bilang pinuno sang SK kag tigayon nga diskwalipikasyon sa pagka-opisyal sa gobyerno.
Gindugang pa sang hepe sang kapulisan sa Koronadal nga ang pagpaidalom sa CBDRP ang padayon nga ginabantayan kag gina-inform ang tanan nga katapo sang anti-drug councils.
Indi magkahulugan nga tungod nagsungka ang isa ka nagagamit sang druga amo nga indi na ini pagdakpon.
Sa pihak sang amo nga insidente, padayon ang ginahimo nga mga lecture kag kampanya sang Koronadal PNP batok sa pag-abuso sang ilegal nga droga sa mga barangay kag ilabi na sa mga estudyante agud malikawan ang malain nga epekto sini sa komunidad.
Kaangot sini, nagapanawagan ini sa tanan nga indi pa ulihi. Kon sinsero ang sinuman nga magbag-o, bukas ang puertahan sang Koronadal PNP agud buligan sila nga matuytoyan kag ma-islan para sa mas maayo nga pangabuhi.
