Ginkilala ni Koronadal City Mayor Erlinda “Bing Pabi” Araquil ang kontribusyon sang Provincial Government sang South Cotabato kag ang inisyatibo ni anay City Mayor Eliordo “Bebot” Ogena sa pagsugod sang pagtukod sang Manuel C. Callejo–City of Koronadal Infirmary Hospital sa Barangay Rotonda, syudad sang Koronadal.
Sa iya mensahe sa ginpatigayon nga groundbreaking ceremony, ginpahayag ni Araquil nga may yara sang ₱50 milyon nga pondo para sa proyekto, nga nagalakip sang ₱45 milyon para sa konstruksyon sang ospital kag ₱5 milyon para sa mga kagamitan nga ibutang sa pasilidad.
Suno sa alkalde, dako ang papel sang suporta kag komitment sang gobernador sa pagpatuman sang proyekto, ilabi na ang una nga hugna sang pagtukod sini. Ginakabig man niya ini nga importante nga tikang sa dugay na nga handum sang syudad nga may kaugalingon nga ospital nga makaserbisyo sa mga pumuluyo.
Ginpaathag man ni Araquil nga nagakinahanglan sang dugang nga pasilidad panglawas ang Koronadal bangod sa kadamuon sang mga pasyente nga nagasalig sa South Cotabato Provincial Hospital. Suno sa iya, mahimo nga indi masarangan sang kasamtangan nga pasilidad nga mahatagan sang nagakaigo nga lugar ang tanan nga nagakinahanglan sang pagbulong.
Gani, ginapaabot nga paagi sa pagtukod sang City of Koronadal Infirmary Hospital, madugangan ang mga opsyon sang mga pumuluyo sa pagkuha sang serbisyong medikal, ilabi na para sa mga ordinaryo nga pamilya nga indi makasarang sa mataas nga magasto sa pribado nga mga ospital.
Ginpabutyag ni Araquil nga ang proyekto isa ka tikang agud mapalapad ang access sang mga pumuluyo sa mas barato kag mas maabot nga serbisyo panglawas sa syudad.
