Nagapreparar na ang syudad sang Koronadal sang El Niño contingency plan agud maminusan ang posible nga epekto sang nagapamala nga kondisyon sa agrikultura kag sa pangabuhian sang mga mangunguma.
Kabahin sini ang pagmiting sang mga nagkalain-lain nga opisina sang gobyerno, lakip ang City Agriculture Office, City Veterinary Office, City Bureau of Fire Protection, City Health Office kag City Disaster Risk Reduction and Management Office ukon CDRRMO, agud latagon ang tagsa nila ka tikang kag action plan sa pagpanghanda sa Super El Niño.
Lakip sa mga ginatutukan amo ang husto nga pagdumala sang patubig, pagtakda sang nagakaigo nga schedule sang pagtanom, kag pagpili sang alternatibo nga mga pananom kon indi mangin paborable ang suplay sang tubig para sa pagtanom sang palay.
Kabahin man sa pagpanghanda ang climate change forum agud mapataas ang kaalam sang nagkalain-lain nga sektor sa mga nagakaigo nga tikang sa pag-atubang sang posible nga epekto sang Super El Niño.
Paagi sa sini nga mga tikang, ginatuyo nga mabuligan ang mga mangunguma sa pagplano sang ila pananom kag maminusan ang posible nga pagkalugi bangud sa kakulang sang tubig.
