Ginkabig ni Atty. Antonio Bendita, anay alkalde sang Surallah, South Cotabato, nga posible may legal nga basehan ang desisyon sang prosecution panel nga i-withdraw ang tatlo sa apat ka articles of impeachment batok kay Vice President Sara Duterte.
Sa interview sang Bombo Radyo Koronadal, ginpahayag ni Bendita nga posible nga nagapati ang prosecution nga bastante na ang ila ebidensya sa nabilin nga article agud mapamatud-an ang ila mga alegasyon batok sa bise presidente.
Apang, suno sa iya, mahimo man nga makahatag ini sang bentaha sa depensa bangod isa na lamang ka article ang magapabilin nga kabahin sang paghusay.
Ginpaathag ni Bendita nga ang impeachment indi ordinaryo nga criminal case, kundi isa ka proseso sa idalom sang Konstitusyon.
Sa masunod nga mga hugna sang paghusay, pagausisaon ang mga ebidensya kag testimonya sang prosecution, lakip ang mga objection sang depensa. Pagkatapos sini, hatagan man sang kahigayunan ang depensa nga magpresentar sang ila kaugalingon nga ebidensya kag argumento.
Dugang pa niya, mahimo magdugay ang proseso depende sa kadamuon sang mga testigo kag sa posibilidad sang mga pag-postpone sang trial
Mahimo magresulta ang impeachment sa pagpahalin sa puwesto sang isa ka impeachable official, samtang separado ini sa criminal proceedings nga mahimo magresulta sa pagkapreso kon mapamatud-an ang kriminal nga responsibilidad.
