Naghatag sang oportunidad si anay NBA superstar Dwyane Wade sa mga piling batang Pilipino nga basketbolista nga makabaton sang personal nga pagtudlo kag training halin sa isa sa mga kilala nga kampeon sa kasaysayan sang National Basketball Association (NBA).
Ginpangunahan ni Wade, kaupod ang kilala nga basketball trainer nga si Chris Johnson, ang training session para sa mga piling kampeon sang Palarong Pambansa sa Taguig City.
Ginapaabot nga ang pila sa mga batang manlalaro magapadayon sa ila basketball career kag posible nga makasulod sa nagkalain-lain nga basketball team sa Pilipinas ukon sa iban nga liga.
Nahimo man nga bahin sang pagbisita ni Wade sa Manila ang mga aktibidad para sa iya signature shoes kag mga interactive fan event nga gintambungan sang ginatos nga mga Pilipino nga basketball fans.
Ginpahayag ni Wade nga madugay na niya nga handom nga makakadto sa Pilipinas agud personal nga makigkita kag makaupod ang iya mga fans, nga padayon nga nagasuporta sa iya bisan tapos na ang iya propesyonal nga karera sa NBA.
Si Wade isa ka 13-time NBA All-Star kag tatlo ka beses nga NBA champion sa sulod sang iya 16 ka season sa liga.
