Ginapabutyag sang isa ka opisyal sang South Cotabato Chamber of Commerce and Industry ang importansya sang padayon kag malawig nga promosyon sa mga lokal nga negosyo agud mas makilala ini sang publiko kag mangin madamo ang mabalik nga mga kustomer.
Sa interview sang Bombo Radyo Koronadal kay Atty. RJ Sustiguer, Executive Vice President sang South Cotabato Chamber of Commerce and Industry, iya ginpahayag nga makita niya ang tinuyo nga pagpanikasog sang Local Government Unit sang Koronadal City sa pagpatigayon sang Negosyo Festival sang nagligad nga bulan sang Oktubre.
Suno kay Sustiguer, naghatag sang oportunidad ang nasambit nga aktibidad sa pagpakilala sang nagkalain-lain nga produkto kag serbisyo sang mga lokal nga negosyante, paagi sa mga aktibidad pareho sang coffee competition, night market kag flea market.
Apang, ginpaathag niya nga indi garantiya ang pagpatigayon sang mga event nga magdagsa dayon ang mga kustomer sa tanan nga negosyo, bangud may yara gid sang mga negosyo nga makabenepisyo, samtang ang iban mahimo nga indi makabawi sang ila kapital.
May kaangtanan diri, ginpahanumdom ni Sustiguer nga indi dapat magbase lamang sa isa ka aktibidad ang pag-usisa sang kalampusan ukon kapierdehan sang negosyo.
Dugang pa niya, kinahanglan nga padayon kag malawig ang pagpromote sang mga produkto kag serbisyo, bangud nagakinahanglan ini sang tion agud makilala sang publiko, makakuha sang pagsalig sang mga kustomer kag mapabalik sila sa negosyo.
Gani, iya ginpabutyag nga bisan importante ang mga aktibidad pareho sang Negosyo Festival sa paghatag sang exposure sa mga lokal nga negosyante, kinahanglan gihapon ini sundan sang padayon nga estratehiya sa promosyon agud mangin malungtaron ang ila negosyo.
