Preparado na ang pila ka mangunguma sa Syudad sang Koronadal sa posible nga epekto sang palaabuton nga Super El Niño.
Sa interview sang Bombo Radyo Koronadal kay Tatay Romeo, isa ka mangunguma sa syudad sang Koronadal, iya ginpahayag nga posible nga maapektuhan ang ila pagpanguma kun magpatuman sang water cut-off ang National Irrigation Administration (NIA).
Ginpahayag man niya nga maayo pa ang ila ani sa subong kag may kinitaan sila, bisan pa nga igo lamang ini sa ila mga kinahanglanon.
Samtang, nakabaton man sila sang abuno halin sa Department of Agriculture (DA) nga makabulig sa ila pagpanguma.
Madumduman nga nauna nga nga ginpahayag ni South Cotabato Governor Reynaldo Tamayo Jr. ang kinahanglanon sang maayo nga storage facility agud matipigan ang sobra nga mga produkto sang mga mangunguma sa tion sang harvest season.
Suno kay Tamayo, may yara sang surplus ukon sobra nga produkto sa tion sang anihan, gani kinahanglan nga mahatagan ini sang aksyon agud matipigan ang sobra nga ani kag mabaligya sa tion nga nagnubo naman ang suplay sa merkado.
Ginpahayag man sang gobernador nga dugay na niya nga ginaduso ang amo nga tikang kag kinahanglan nga mapadasig ang aksyon sa sini nga programa.
Nagpanawagan man si Romeo nga tani indi pagpaubson ang presyo sang ila mga produkto agud may nagakaigo sila nga kinitaan para sa ila pangabuhi kag mga kinahanglanon, lakip na ang iya gasto sa pagpa-dialysis.
