Mabaskog nga suporta ang ginpabutyag ni Norala Mayor Clemente Fedoc sa palaabuton nga Dugong Bombo 2026 nga natalana nga ipatigayon sa Nobyembre 14, 2026, sa KCC Mall of Marbel.
Sa interview sang Bombo Radyo Koronadal, ginpahayag ni Fedoc nga importante ang pagdonar sang dugo bangud isa ini ka paagi agud makabulig kag makaluwas sang kabuhi sang mga tawo nga nagakinahanglan sang dugang nga suplay sang dugo.
Gindugang sang alkalde nga nagasanto ini sa mensahe sang Philippine Red Cross nga, “The life you save may be your own.” Para kay Fedoc, ang pagdonar sang dugo indi lamang paghatag sang bulig sa iban, kundi isa man ka makahulugan nga tikang agud makahatag sang paglaum sa mga pasyente nga nagapakigbato para sa ila kabuhi.
Bangud sini, gin-encourage ni Fedoc ang publiko nga magpartisipar sa Dugong Bombo 2026 kag mangin kabahin sang inisyatibo nga nagatuyo sa pagbulig sa mga nagakinahanglan sang dugo.
Paagi sa pagdonar, ginapaabot nga mas madugangan ang suplay sang dugo nga mahimo magamit sa mga emerhensya kag sa nagkalain-lain nga medikal nga kinahanglanon, agud nga mas madamo pa nga kabuhi ang maluwas.
