Ginkumpirma ni Atty. Michael Poa nga igapahayag sang kampo ni Bise Presidente Sara Duterte ang ila panig tuhoy sa mga alegasyon sang indi maathag nga manggad sa tion nga ipresentar na nila ang ila mga ebidensya sa impeachment trial.
Gin-agda ni Atty. Poa ang publiko nga konsiderahon nga ang mga natalakay sa mga trial tubtob subong nagabase pa lamang sa bahin sang prosekusyon.
Samtang, nagdumili man siya nga talakayon ang mga kantidad sang credit card transactions kag ang ginapahayag nga mga transaksyon sa iban nga pungsod, lakip ang mga may kaangtanan sa isa ka kompanya, bangud sa sub judice rule ukon ang paglikaw sa pagkomento sa mga butang nga yara pa sa proseso sang paghusga
/Suno kay Poa, indi patas sa prosekusyon kun ipagwa nila ang mga detalye sang ila depensa antes pa nila maipresentar ang ila mga ebidensya.
Ginkilala man niya nga yara sa dehado nga posisyon ang depensa bangud kinahanglan pa nila hulaton ang ila turno nga magsabat, labi na sa kaso nga may mabaskog nga politikal nga aspeto.
Apang ginpabutyag niya nga may kaugalingon man nga panugiron ang kampo ni Duterte nga ila ipresentar sa nagakaigo nga tion.
