Ginpakwestyon ni Senador kag senator-judge Joel Villanueva kun paano nakarekord sang sobra P150 milyon nga baligya sang 2024 ang Cale88 Foods Corp., isa ka exporter sang banana chips nga ginaangot sa negosyo ni Manases Carpio, bana ni Bise Presidente Sara Duterte, bisan wala ini nagdeklarar sang empleyado sa iya General Information Sheet (GIS) sa amo nga tuig.
Sa impeachment trial sang Biyernes, Oktubre 9, ginpahayag ni Villanueva nga nakarekord ang kumpanya sang P150.76 milyon nga sales kag P6.13 milyon nga pagkalugi sang 2024.
Suno sa testigo sang Bureau of Internal Revenue (BIR) nga si Atty. Anne Lorraine Garcia-Marquez, nakabutang sa financial statements sang kompanya ang mga galastuhan para sa direct labor kag sweldo, apang wala sang detalye kun pila ang mga trabahante ukon kontratista sini.
Ginpakwestyon man sang senador ang mga dokumento nga nagasuporta sa foreign transactions sang kompanya, lakip ang sales invoices, shipping records kag logistics costs.
Ginpaathag sang testigo nga yara sa iya ang audited financial statements kag income tax return, apang wala ang mga invoice kag iban pa nga supporting documents.
Samtang, suno sa report sang Anti-Money Laundering Council (AMLC), nakabaton ang Cale88 sang kabug-usan nga P319.2 milyon nga inward remittances halin sa China halin 2022 tubtob 2025.
Sang ginpamangkot kun paano napondohan ang operasyon sang kompanya bisan nagkalugi ini, ginpahayag ni Garcia-Marquez nga nakabutang sa financial statements ang promisa sang management ukon mga tag-iya nga magpadayon sa paghatag sang pinansyal nga suporta.
