Ginkabig nga malampuson kag masadyahon ang pagtakop sang ika-26 nga Charter Anniversary sang Koronadal City, ilabi na sa paghatag sang oportunidad sa mga lokal nga negosyo nga mapakilala ang ila mga produkto kag serbisyo.
Sa interview sang Bombo Radyo Koronadal, ginpahayag ni Quincy Limbo, isa ka estudyante sa syudad, nga isa sa importante nga katuyuan sang selebrasyon amo ang pagsuporta sa micro, small kag medium enterprises (MSMEs) paagi sa pagpakita sang ila mga negosyo sa publiko.
Suno kay Limbo, natuman sang selebrasyon ang katuyuan sini nga mapakita ang nagkalain-lain nga negosyo sa Koronadal kag mahatagan ang mga negosyante sang kahigayunan nga mapalapad ang ila merkado.
Gindayaw man niya ang seguridad sa tion sang pagtakop sang anibersaryo. Suno sa iya, mabatyagan ang kahilwayan kag kaluwasan bangod may mga awtoridad nga nagapatrolya sa palibot, samtang may mga personnel man nga nakatalaga sa mga entrada kag guwaanan sang venue.
Dugang pa ni Limbo, nangin makalilipay ang selebrasyon, ilabi na ang aktibidad nga pa-raffle nga gindaluhan kag gin-enjoy sang mga partisipante.
Para sa iya, ang malampuson nga pagtakop sang 26th Charter Anniversary nagapakita sang importansya sang mga selebrasyon sang syudad indi lamang bilang kalingawan, kundi bilang oportunidad man sa pagpalig-on sang lokal nga ekonomiya kag paghatag sang mas madamo nga suporta sa mga negosyante sang Koronadal
