Duha ang napatay matapos magguho ang tatlo ka pinakaubos nga andana sang isa ka pito ka-andana nga building sa Maltepe district sa Istanbul, Turkiye.
Suno sa mga awtoridad, lakip sa naguba ang ground floor nga may yara sang isa ka tindahan. Gilayon nga nagresponde ang mga rescue team kag naluwas ang walo ka tawo halin sa mga naguba nga bahin sang building.
Narekober na sang mga awtoridad ang duha ka bangkay, samtang nagapadayon ang search and rescue operation para sa duha pa ka tawo nga ginapatihan nga na-trap sa sulod sang building.
Samtang, luwas nga gin-evacuate ang mga residente nga yara sa mga nabilin nga andana sang building. Ginpa-evacuate man ang mga nagaestar sa pila ka kalapit nga mga building bilang paghalong bangud sa posibilidad nga maguba pa gid ang istruktura.
Wala pa mahibaluan ang eksakto nga kabangdanan sang pagguho. Nagapadayon ang imbestigasyon sang mga awtoridad, upod man sa padayon nga search and rescue operation agod makit-an kag maluwas ang posible nga mga na-trap sa idalom sang mga naguba nga bahin sang building.
