Nagapabilin nga prioridad sang Koronadal City Government ang pagdugang sang revenues kag pagpanubo sang indi kinahanglanon nga gasto, nga wala nagasalig sa dugang nga buhis sa mga taxpayer.
Sa interview sang Bombo Radyo Koronadal ginpahayag ni City Administrator Vicente de Jesus, nga posible nga madugangan, madoble ukon matriple pa ang kita sang syudad paagi sa pagpauswag sang existing income-generating facilities kag paghimo sang bag-o nga revenue sources.
Lakip sa mga ginatan-aw ang pag-convert sang City Hall, terminal kag iban pa nga government facilities sa solar energy agud mapanubo ang kuryente nga ginagasto sang City Government.
Ginalantaw man ang pagpauswag sang income sang integrated public terminal, public market kag slaughterhouse, pati ang pag-develop sang bakante nga government lots bilang business centers kag public-use facilities.
Ginpahayag ni De Jesus nga ipadayon man ang mga programa kag proyekto nga naumpisahan na sang nagligad nga administrasyon, samtang ginapaayo ang implementation base sa kasamtangan nga panginahanglan sang syudad.
Kabahin man sang prayoridad ang pagdugang sang road network bangud sa nagadaku nga populasyon kag nagataas nga volume sang trapiko.
Samtang, ginpunto ni De Jesus ang iya papel sa pag-mobilize, pag-train kag pag-guide sang City Government employees agud mag-align ang ila trabaho sa direksyon sang administrasyon ni Mayor Erlinda Araquil.
Ginduso man niya ang mas daku nga presensya ni Araquil sa ground kag pakig-angot sa mga negosyante, drivers, market vendors, agriculture sector kag iban pa nga stakeholders agud masabat ang aktuwal nga panginahanglan sang mga pumuluyo.
Gin-agda man ni De Jesus ang mga katawhan dire sa syudad nga magpakigbahin sa mga aktibidad sang selebrasyon sang syudad, nga apesar simple lamang, ginapaabot nga mangin madamo ang partisipasyon sang publiko.
