Ginpaathag sang South Cotabato I Electric Cooperative ukon SOCOTECO-I ang pagsaka sang ila electricity rate sa September 2026 billing, matapos makita ang pagtaas sang porsyento sang singil sa nagkalain-lain nga consumer categories.
Sa interview sang Bombo Radyo Koronadal kay Ariel P. Cabinbin, CPA, FSD Manager sang SOCOTECO-I, naglab-ot sa 8.73 porsyento ang electricity rate para sa residential consumers.
Ini mas mataas sang 1.1532 porsyento kon ikomparar sa nagligad nga billing.
Samtang, yara sa 9.70 porsyento ang electricity rate para sa low voltage consumers, nga nagrehistro man sang 1.1569 porsyento nga pagsaka.
Nagsaka man ang rate para sa high voltage consumers nga naglab-ot sa 11.91 porsyento, matapos madugangan sang 1.2274 porsyento.
Sa tunga sang pagsaka sang singil, ginpahayag ni Cabinbin nga importante nga mahatagan sang klaro kag factual nga impormasyon ang mga member-consumer-owners agud mahangpan nila kon diin naghalin ang pagbag-o sa ila billing statement.
Amo man ini, suno sa iya, ang rason kon ngaa nagpatawag ang SOCOTECO-I sang media conference agud direkta nga maipaathag sang kooperatiba ang mga datos kag rason sa likod sang pagsaka sang electricity rate, kag agud man masabat ang mga pamangkot sang mga consumers nahanungod sa ila mga bill.
Ginpabutyag ni Cabinbin nga importante ang paghatag sang matarong kag klaro nga impormasyon sa publiko, ilabi na sa tion nga talalupangdon ang pagsaka sang singil sa kuryente.
Samtang, ginapaabot man nga mahimo pa magbag-o ang electricity rate sa masunod nga mga billing period.
Gani, ginapanawagan ang mga consumers nga talupangdon kag usisaon ang mga detalye kag components sang ila billing statement.
