Nagapanawagan ang Simbahan sa publiko nga likawan kag untatan ang pagbahin-bahin sa tunga sang mga pumuluyo bangud sa nagapadayon nga impeachment trial batok kay Vice President Sara Duterte.
Sa interview sang Bombo Radyo Koronadal, ginpahayag ni Father Angel Buenavides, Vicar General sang Diocese of Marbel, nga sa baylo nga mag-intra sa division bangud sa pagsuporta sa nagkalain-lain nga partido ukon pulitiko, mas maayo nga magpokus ang publiko sa mga butang nga makabulig sa komunidad.
Lakip diri, suno kay Father Angel, ang pagbulig sa mga buluthuan kag iban pa nga institusyon, pagsuporta sa mga programa sang Simbahan, kag pagproteher sa mga kabukiran kag palibot sang probinsya.
Samtang nagapadayon ang debate kag diskusyon bahin sa impeachment, ginpahanumdom man niya ang publiko nga kinahanglan ipabilin ang respeto sa isa kag isa, bisan nagkalain-lain ang ila panan-aw sa politika.
Gindugang ni Father Angel nga indi dapat kalimtan ang pagrespeto sa tindog kag opinyon sang kada isa, samtang ginapangita ang accountability kag pagpanabat sang mga opisyal sang gobyerno.
Apisar sini, nagapati man siya nga may katungod ang tagsa ka Pilipino nga magpahayag sang iya panindugan kag mag-demand sang accountability, bangud ang public office isa ka public trust kag ang mga nagaserbisyo sa gobyerno may responsibilidad sa publiko.
