Ginaduso sang Simbahan kag mga miyembro sang coalition ang mas daku nga transparency sa financial status sang South Cotabato II Electric Cooperative, Inc. ukon SOCOTECO II agud mahibaluan sang mga consumer ang kahimtangan sang kooperatiba nga ila ginabayan.
Sa interview sang Bombo Radyo Koronadal, ginpahayag ni Father Angel Buenavides, Vicar General sang Diocese of Marbel, nga handum sang mga konsumidor nga mahibaluan ang nagakatabo sa pinansyal nga aspeto sang kooperatiba kag indi ini pagataguon sa publiko.
Suno kay Father Angel, importante nga mahatagan sang nagakaigo nga impormasyon ang mga konsumidor, ilabi na bangud sila ang nagabayad para sa serbisyo sang electric cooperative.
Gindugang pa niya nga kun may mga pagbag-o ukon bag-o nga mga tikang sa sulod sang SOCOTECO II, kinahanglan ini ipahibalo sa katawhan agud mangin maathag ang proseso kag masiguro ang accountability sa pagdumala sang kooperatiba.
Gi-insister man Father Angel nga ang transparency kag bukas nga paghatag sang impormasyon makabulig sa pagpalig-on sang pagsalig sang mga konsumidor kag sa paglikaw sa posibilidad sang iregularidad ukon korapsyon.
Samtang, padayon ang panawagan sang Simbahan para sa mas maathag nga financial reporting kag accountability sa SOCOTECO II, ilabi na sa mga isyu nga direkta nga nagaapekto sa mga konsumidor.
