Ginpahayag sang Philippine Red Cross South Cotabato Chapter nga ginbag-o na ang proseso sa pag-acquire sang dugo agud mas mapadasig kag mas mangin accessible ini para sa mga pasyente nga nagakinahanglan sang blood transfusion.
Sa interview sang Bombo Radyo Koronadal kay Erwin Rommel Del Carmen, RMT, administrator sang Philippine Red Cross South Cotabato Chapter, ginpahayag niya nga ang bag-o nga polisiya ginpatuman bilang kabahin sang mando sang Department of Health (DOH) kag ginapatuman sa bilog nga Pilipinas.
Suno kay Del Carmen, indi na kinahanglan nga personal nga magkadto ang pasyente ukon pamilya sa talatapan sang Philippine Red Cross para makakuha sang dugo.
Ang balay bulungan na mismo ang magaprocess sang mga kinahanglanon nga dokumento, samtang ang Philippine Red Cross South Cotabato ang magahatag kag, kon kinahanglan, magadeliver sang dugo sa mga ospital.
Ginpabutyag man ni Del Carmen nga ginapasiguro nila nga may yara sang sapat nga blood stocks ang mga balay bulungan sa Koronadal City kag padayon ini nga ginareplenish agud matubag ang kinahanglanon sang mga pasyente.
Gani, ginawhag niya ang publiko nga indi magpangduhaduha sa pagdonar sang dugo, bangud daku ini nga bulig sa pagmintinar sang sapat nga suplay sang dugo kag sa pagluwas sang kabuhi.
Sa tion nga magkinahanglan sang dugo ang pasyente, ang balay bulungan na mismo ang magaprocess sang mga papeles kag mag-coordinate sa Philippine Red Cross para sa pagkuha sang kinahanglanon nga dugo.
