Nag-nubo ang numero sang mga barangay sa Norala nga ginakabig nga flood-prone.
Sa interview sang Bombo Radyo Koronadal kay Norala Mayor Clemente Fedoc, ginpahayag ni Fedoc nga sa pagsugod sang pag-ulan sa banwa, wala sang nangin seryoso nga concern ukon report sang pagbaha halin sa mga barangay nga yara sa flood-prone areas.
Suno sa alkalde, normal lamang ang kadam-an nga pag-ulan sa Norala kag indi ini tuman kabaskog agud magresulta sa pagbaha.
Ginpabutyag man ni Fedoc nga nag-nubo na ang kadamuon sang flood-prone barangays bisan wala pa matuman ang irrigation program sang National Irrigation Administration ukon NIA.
Gani, ginpasalamatan ni Fedoc ang Provincial Government kag mga personnel nga naka-assign sa Norala bangod sa madasig nga pag-aksyon sa mga problema kag concern sa mga lugar nga ginakabig nga flood-prone.
Suno sa alkalde, padayon ang pagmonitor sang sitwasyon agud malikawan ang posible nga pagbaha kag maprotektahan ang mga residente sa mga apektado nga lugar.
