Ginpahayag ni Norala Mayor Clemente Fedoc nga ang pagsuspinde sang klase sa banwa bilang kabahin sang pagsaulog sang National Teachers’ Day subong nga adlaw, Oktubre 5 isa ka pamaagi agud mahatagan sang respeto, pagkilala kag importansya ang mga manunudlo bangud sa ila dako nga kontribusyon sa edukasyon kag paghulma sang palaabuton sang kabataan.
Sa interview sang Bombo Radyo Koronadal, suno kay Mayor Fedoc, ginpatuman niya ang amo nga praktis halin sang iya pagumpisa bilang mayor sang Norala agud mahatagan sang tion ang mga manunudlo nga ma-appreciate ang ila pagpanikasog kag dedikasyon sa pagtudlo kag paggiya sa mga estudyante.
Ginpahayag man niya nga indi lamang kaalam kag laygay ang ginahatag sang mga manunudlo, kundi pati suporta kag paggiya sa mga kabataan sa pag-atubang sang ila mga kabudlayan. Para kay Fedoc, daku ang papel sang mga manunudlo sa pagkab-ot sang mga estudyante sang ila mga handum kag sa paghulma sa ila bilang isa ka professionals kag responsable nga mga indibidwal.
Gani, gin-agda niya ang publiko, ilabi na ang mga professionals, nga dumdumon kag pasalamatan ang mga manunudlo kag iban pa nga indibidwal nga nangin kabahin sang ila pag-uswag kag nangin instrumento sa pagkab-ot sang ila mga handum.
Nagpaabot man si Fedoc sang iya pagpasalamat sa tanan nga manunudlo, ilabi na sa mga yara sa Norala, South Cotabato, tungod sa ila padayon nga dedikasyon sa paghatag sang maayo kag dekalidad nga edukasyon sa mga kabataan.
