Nagpadala ang Philippine Coast Guard (PCG) sang mga tauhan kag mga barko sini agud magpartisipar sa 24th Regional Marine Pollution Exercise sa Bitung–Manado, North Sulawesi, Indonesia.
Naghalin ang PCG contingent sa Pier 13, South Harbor, Manila sang Oktubre 2 bilang preparasyon sa maritime exercise nga ipahigayon halin Oktubre 8 tubtob Oktubre 12.
Lakip sa mga barko nga magapartisipar ang BRP Gabriela Silang kag BRP Tubbataha, kaupod ang mga tauhan halin sa Marine Environmental Protection Command, Special Operations Force, Medical Service kag Nursing Service.
Katuyuan sang Regional MARPOLEX nga mapabakod ang koordinasyon kag kahandaan sang mga nagapartisipar nga pungsod sa pag-atubang sang oil pollution, hazardous and noxious substances, rescue operations kag iban pa nga marine emergencies.
Pangunahan sang Directorate General of Sea Transportation sang Indonesia, kaupod ang Japan Coast Guard ang aktibidad.
Suno sa PCG, makabulig ang amo nga paghanas sa pagpalig-on sang regional cooperation kag kapasidad sang mga pungsod sa pagtubag sa mga insidente nga mahimo makaapekto sa kadagatan.
