Gin-imbestigaran sang Bureau of Fire Protection (BFP) Tantangan ang sunog nga nag-abo sa isa ka puluy-an sa Purok O’Belo, Barangay San Felipe, Tantangan, South Cotabato.
Suno kay FO1 Jason Magbanua, BFP Tantangan investigator, pasado alas-4 sang hapon sang ma-report ang insidente nga nagluntad sa balay nga ginapanag-iyahan sang pamilya Maldaran-Yulan.
Base sa inisyal nga imbestigasyon, sa sala sang balay una nakita sang mga saksi ang kalayo. Gilayon nga nagibwal ang sunog kag nagtuga sang daku nga danyos sa puluy-an, nga ginkabig nga totally damaged.
Naapektuhan man sang kalayo ang bahin sang balay sang utod sang tag-iya. Wala naman sang na-report nga may napilasan ukon namatyan bangud nakagwa pa sa puluy-an ang mga miyembro sang pamilya antes nagdaku ang kalayo.
Gin-estimate sang BFP nga kapin P35,000 ang initial damage sa propiedad. Padayon pa ang imbestigasyon agud mahibaluan ang eksakto nga gintunaan sang sunog.
Samtang, nagpahanumdom ang BFP sa publiko nga inspeksyunon kag i-double check ang mga electrical connection, appliances, kalan kag LPG antes maghalin sa balay.
Gin-agda man ang mga naga-install sang Christmas lights nga maggamit lamang sang mga produkto nga nagaabot sa safety standards kag may angay nga ICC mark.
Ginpabutyag man ni Magbanua ang importansya sang gilayon nga pagreport sa mga awtoridad kon may matabo nga sunog agud mapadasig ang pagresponde kag malikawan ang paglapta sang kalayo.
