Inaprubahan ng Budget Amendments Review Subcommittee (BARSc) ng House Committee on Appropriations ang budget realignments na magdaragdag ng ₱8.072 bilyon sa panukalang pondo para sa education sector sa 2027.
Sa ilalim ng Department of Education (DepEd), kabilang sa mga nakatakdang dagdagan ang pondo ang School Safety and Security ng ₱500 milyon, Academic Recovery and Accessible Learning (ARAL) Program ng ₱350 milyon, at Basic Education Facilities Fund ng ₱952 milyon.
May karagdagang alokasyon din para sa Madrasah Education Program, Special Needs Education Program at Indigenous Peoples Education Program. Sa kabuuan, ₱1.952 bilyon ang realignment para sa basic education.
Para naman sa higher education, naglaan ng ₱2.102 bilyon para sa Tertiary Education Subsidy at ₱1.766 bilyon para sa Tulong Dunong Program sa ilalim ng Commission on Higher Education (CHED).
Nadagdagan din ang pondo para sa University of the Philippines System, habang ₱456 milyon ang inilaan para sa Locally Funded Projects ng iba’t ibang State Universities and Colleges (SUCs).
Samantala, nakatakda ring makatanggap ang Technical Education and Skills Development Authority (TESDA) ng karagdagang ₱1.44 bilyon para sa mga scholarship at training program.
Ayon kay House Committee on Appropriations chairperson at Nueva Ecija Rep. Mikaela Angela Suansing, bahagi ng hakbang ang commitment ng Kamara na maglaan ng malaking bahagi ng pambansang badyet para sa education sector.
