Nagpatuman sang bag-o nga fare adjustments ang Land Transportation Franchising and Regulatory Board ukon LTFRB Central Office sugod Setyembre 28, 2026, kasunod sang pagsaka sang presyo sang petrolyo kag nagapadayon nga pagtaas sang operational expenses sang mga transport groups.
Sa interview sang Bombo Radyo Koronadal kay Bernard Bolanio, Consultant to Operations sang Yellow Bus Line Inc., iya ginpahayag nga ang fare adjustments ginbase sa fare guide nga ginpagwa sang LTFRB Central Office, kasunod sang memorandum for petition nga gin-isyu sang Department of Transportation ukon DOTr sang Setyembre 25, 2026.
Suno kay Bolanio, ginclasify sang LTFRB Central Office ang mga bus sa tatlo ka kategorya—Luxury Bus, Airconditioned Super Deluxe Bus, kag Ordinary Bus ukon non-airconditioned bus, nga may tagsa-tagsa ka katumbas nga fare adjustments.
Para sa Luxury Bus, ang rate nga P290 kada kilometro sang una, nagsaka sa P335 kada kilometro. Samtang ang Airconditioned Super Deluxe Bus nga P235 kada kilometro sang una, yara na sa P270 kada kilometro.
Sa Ordinary Bus naman, ang pamasahe nga P11 sa first succeeding kilometers kag P190 kada kilometro, nagsaka sa P12 sa first succeeding kilometers kag P220 kada kilometro.
Kaangot sini, ginpahayag ni Bolanio nga kinahanglan ang suporta kag nagakaigo nga mga tikang halin sa gobyerno agud mabuligan ang mga transport groups sa pag-atubang sang epekto sang padayon nga pagsaka sang presyo sang petrolyo.
Suno sa iya, indi lamang mga pasahero ang apektado sang pagsaka sang presyo sang gatong, kundi pati man ang mga operator kag empleyado sa transport sector nga nagaatubang sang nagadugang nga gasto sa operasyon.
