May yara sang positibo kag negatibo nga implikasyon ang pagpaisol sang Barangay and Sangguniang Kabataan (SK) elections kag ang pagpalawig sang termino sang mga barangay officials suno kay Neil Ryan Escobillo, Presidente sang Association of Barangay Captains–South Cotabato Chapter.
Sa interview sang Bombo Radyo Koronadal kay Escobillo nga ang ginpalawig nga termino ang mahimo magserbe nga kahigayunan para sa mga high-performing officials nga makapadayon kag makatapos sang ila mga programa kag proyekto para sa mga pumuluyo.
Apang ginhatagan pagtamod sini nga mahimo man nga may negatibo nga epekto kun mapalawig ang tenure sang mga opisyal nga underperform sa ila tagsa ka lugar.
Nahanungod sa sini nga dugang nga tion sa opisina, ginsambit ni Escobillo nga ang pagpabakod sang suporta para sa sektor sang edukasyon sa Tampakan—partikular para sa mga estudyante sa elementarya,highschool, kag kolehiyo—isa sa ila mga prayoridad.
Kadungan sini, ginhingyo sini sa mga kaupod niya nga barangay officials nga gamiton sang maayo ang ginpalawig nga termino kag siguraduhon ang pagpatuman sang mga programa kag proyekto antes matapos ang ila termino.
Para kay Escobillo, importante gid nga tan-awon ang pagpalawig bilang isa ka oportunidad sa paghatag sang mabatyagan nga mga serbisyo kag mga benepisyo sa ila mga constituents.
