Ginpahayag ni Atty. Antonio Bendita nga may awtoridad ang Senate Impeachment Court nga maghimo kag mag-interpretar sang iya parliamentary rules sa impeachment proceedings batok kay Vice President Sara Duterte.
Sa interview sang Bombo Radyo Koronadal, ginpahayag ni Bendita, nga ang Senado bilang impeachment court nagapadayon bilang parliamentary body, gani mahimo sini nga i-interpretar ang constitutional provision parte sa two-thirds voting threshold.
Mahimo, suno sa iya, nga ibase ang two-thirds requirement sa mga senator-judge nga kwalipikado kag aktibo nga nagapartisipar sa proceedings, imbes nga awtomatiko nga gamiton ang kabug-usan nga 24 ka senador bilang denominator.
Ginpunto man niya nga ang impeachment indi criminal ukon civil case, kundi proseso sa pagdesisyon kon ang opisyal dapat magpabilin sa iya posisyon kag posible nga ma-disqualify sa paghawid sang public office.
Para kay Bendita, mahimo ma-review sang Supreme Court ang voting threshold bangud isa ini ka justiciable nga legal nga isyu.
May mga petisyon na nga nagakwestyon sa ruling kag sa pamaagi sang impeachment court sa pagdeterminar sang denominator sang two-thirds vote. Ginklaro man niya nga ang status quo ante order nagatuyo nga ibalik anay ang kahimtangan sa wala pa ginpatuman ang ginkwestyon nga aksyon ukon ruling.
Ang TRO, sa pihak nga bahin, isa ka temporaryo nga mando nga nagapugong sa pagpatuman sang isa ka aksyon samtang ginatan-aw pa sang korte ang legal nga isyu.
Sa karon, wala pa nagpagwa ang Supreme Court sang TRO ukon status quo ante order batok sa ruling.
Gani, suno sa Senate President Chiz Escudero, nagapadayon ang impeachment proceedings samtang ginahulat ang aksyon sang Supreme Court.
