Nagbisita si Cabinet Secretary Benjamin “Benhur” Abalos Jr. sa Banga National High School kasunod sang insidente nga nagluntad sa amo nga buluthuan.
Sa interview sang Bombo Radyo Koronadal, ginpahayag ni Abalos nga kabahin sa iya pagbisita ang pagdala sang mensahe ni Presidente Ferdinand “Bongbong” Marcos Jr. para sa mga pamilya nga naapektuhan sang insidente.
Suno kay Abalos, luyag sang Presidente nga ipabatyag sa mga pamilya nga kaupod nila ang gobyerno sa pag-atubang sang kasubo kag kabudlayan nga ila ginatubang.
Nagbisita man si Abalos sa puluy-an sang duha ka estudyante agud kamustahon ang kahimtangan sang tagsa ka pamilya kag mahibaluan ang ila mga kinahanglanon.
Samtang, ginpanawagan ni Abalos nga tugutan anay ang mga otoridad nga makompleto ang imbestigasyon agud mahibaluan ang bug-os nga kamatuoran nahanungod sa insidente.
Ginpahayag man niya nga masakit kag mabudlay gihapon para sa mga pamilya kag komunidad ang pagbaton sa natabo sa Banga National High School.
