KORONADAL CITY – Gilayon nga nagresponde ang mga otoridad matapos makabaton sang impormasyon nahanungod sa isa ka online shooting threat batok sa Kapingkong National High School sa Purok Pag-asa, Barangay Kapingkong, Lambayong, Sultan Kudarat.
Suno sa report sang kapulisan, mga alas-1:20 sang kaagahon sang nakabaton sila sang impormasyon halin sa isa ka manunudlo nahanungod sa posibleng pamahog nga ginpalapta paagi sa Facebook post kag screenshot.
Gilayon nga ginpadulungan sang mga otoridad ang puluy-an sang 13-anyos nga menor de edad nga ginatudlo may kaangtanan sa nasambit nga online post.
Ginkonsulta man ang iya mga ginikanan nahanungod sa insidente kag sa posible nga legal nga epekto sang ginhimomo nga ginhimo.
Gindala ang menor de edad, kaupod ang iya guardian, sa Matiompong Barangay Hall para mahatagan sang nagakaigo nga pagsaysay kag paggiya.
Samtang, ginpaidalom naman sang Municipal Social Welfare and Development Office ukon MSWDO ang menor de edad kag iya guardian sa psychosocial intervention, lakip ang counseling, bilang kabahin sang pag-atipan kag pag-monitor sa sitwasyon.
Sa karon, yara anay sa kustodiya sang iya guardian ang menor de edad samtang padayon ang pagmonitor sang mga otoridad agud malikawan ang posible nga insidente kag masiguro ang iya kaayuhan.
