Gilayon nga nagresponde ang Banga Municipal Disaster Risk Reduction and Management Office (MDRRMO) matapos makabaton sang emergency call pasado ala-una sang hapon nahanungod sa shooting incident sa Banga National High School.
Suno kay MDRRMO Joseph Franco, lima ka patient transport vehicles ang gin-deploy sang ahensya padulong sa crime scene kag mga ospital agud maasikaso kag madala gilayon ang mga biktima nga nagkinahanglan sang medical attention.
Base sa initial nga na-consolidate nga datos sang MDRRMO, tatlo ang kumpirmadong napatay, lakip ang gina-report nga shooter. May mga injured naman nga padayon nga ginabulong kag ginamonitor sa mga ospital.
Ginpahayag ni Franco nga isa sa mga pasyente ang kritikal ang kondisyon kag gindala sa ISGS, samtang ang iban yara sa Provincial Hospital. Duha naman ka pasyente ang nakapa-outpatient base sa pinakahuli nga impormasyon nga nabaton sang MDRRMO.
May tatlo man ka estudyante nga nag-collapse bangud sa nervous reaction ukon trauma matapos ang insidente kag gin-asikaso sang responders.
Ginkumpirmar man sang MDRRMO nga mga kabataan ang kalabanan sa mga involved sa insidente, apang padayon pa ang pag-consolidate kag pag-verify sang iban nga detalye kaupod ang local police.
Nagpangabay si Franco sa publiko nga magsalig lamang sa opisyal kag beripikado nga impormasyon, ilabi na sa casualty figures kag kondisyon sang mga biktima, agud malikawan ang paglapta sang wala pa makumpirmar nga impormasyon.
Samtang, gin-awhag sang MDRRMO ang mga ginikanan nga magin mas mabinantayon sa ila mga kabataan kag siguruhon nga nahibaluan nila kon ano ang ginadala sang ila mga kabataan antes magkadto sa buluthuan.
Ginduso man ang aktibo nga pag-report sa mga otoridad sang bisan ano nga makaduluda nga hulag ukon sitwasyon bilang kabahin sang pagpalig-on sang seguridad sa mga institusyon kag komunidad.
