Nagpabutyag sang pagkadismaya ang isa ka tricycle driver sa Syudad sang Koronadal bangod sa pagdamo sang mga colorum nga traysikol nga nagabyahe, samtang sila nga mga legal nga nagapangabudlay ang nagaatubang sang pagnubo sang kita kada adlaw.
Sa interview sang Bombo Radyo Koronadal kay Celso Libares, iya ginpahayag nga dako ang epekto sa ila pangabuhi sang kompetisyon halin sa mga colorum nga traysikol, ilabi na sa tunga sang padayon nga pagsaka sang presyo sang gatong.
Suno kay Libares, indi igo ang gamay nga pagnubo sang presyo sang gatong agud matakpan ang mas daku nga pagsaka sini. Paathag niya, bisan magnubo sang P2 ukon P3 ang presyo sang gatong, mahimo man ini nga mabawi sang pagsaka nga nagalab-ot sa P5, P6 ukon mas mataas pa.
Bangud sini, nagapanawagan siya sa Koronadal City Government nga madasig nga aksyunan ang petisyon sang mga tricycle driver nga ipasaka ang pamasahe sa syudad.
Suno sa iya, dako ini nga bulig agud mahagan-hagan ang palas-anon sang mga legal nga tricycle driver nga nagaatubang sang nagasaka nga gasto sa gatong kag iban pa nga kinahanglanon sa ila adlaw-adlaw nga pangabudlay.
