Nagapadayon ang tikang para sa pagtukod sang South Cotabato State University sa Surallah, South Cotabato matapos mapasar na sa Kongreso ang ginaproponer nga layi para sa sini.
Ginpabutyag ni Senior Deputy Speaker kag South Cotabato 2nd District Representative Atty. Ferdinand “Dinand” Hernandez nga napasar na sa Kamara ang hagna kag ginahulat na lamang ang counterpart bill sini sa Senado agud mahimo ini nga pormal nga layi.
Kaangot sini, ginpahayag ni House Speaker Faustino “Bojie” Dy III nga padayon ang suporta sang Kongreso sa South Cotabato, ilabi na sa mga proyekto kag programa nga makabulig sa pagpauswag sang probinsya.
Ginpabutyag man ni Dy ang posibilidad sang pagdugang sang allowance para sa mga estudyante, bangod para sa iya, importante ang paghatag sang igo nga suporta sa edukasyon agud masiguro ang mas maayo nga palaabuton sang kabataan.
Samtang, ginakabig nga isa ka importante nga tikang ang pagtukod sang South Cotabato State University bangud magahatag ini sang dugang nga oportunidad sa mga estudyante sa probinsya nga makakuha sang kalidad kag mas lapit nga edukasyon.
