Walong katao ang nasawi sa magkakahiwalay na pag-atake ng Russia sa ilang bahagi ng Ukraine, habang marami rin ang nasugatan at napinsala ang ilang imprastraktura.
Kabilang sa tinamaan ang Starokozache border crossing sa Odesa region, malapit sa Moldova. Dalawang sibilyan ang nasawi at tatlo ang nasugatan matapos tamaan ng mga drone ang lugar, na nagresulta rin sa pansamantalang paghinto ng trapiko sa mahalagang border route.
Iniulat din ang mga pag-atake sa Kyiv, Sumy, Kryvyi Rih at iba pang bahagi ng Ukraine, na nagdulot ng karagdagang casualties at pinsala.
Samantala, sinabi ng Russian Defense Ministry na kabilang sa kanilang mga target ang isang Ukrainian cargo vessel sa Black Sea na umano’y may dalang kagamitang pandigma. Ayon sa Moscow, patungo ito sa Odesa bago tinamaan ng pag-atake.
