Padayon ang preparasyon sang Office of the Provincial Agriculturist (OPA), kaupod ang Provincial Disaster Risk Reduction and Management Office (PDRRMO), para mabuligan ang mga mangunguma nga mahimo maapektuhan sang El Niño sa bug-os nga probinsya.
Suno kay Elias O. Diamante Jr., Integrated Pest Management/Disaster Risk Reduction and Management Focal Person sang OPA, padayon ang ila paghimo sang proposal para sa pagtukod sang mga solar-powered water pump bilang kabahin sang suporta sa mga mangunguma nga mahimo maapektuhan sang nagataas nga temperatura kag kakulang sang tubig.
Ginpahayag ni Diamante nga paagi ini agud masiguro ang padayon nga suplay sang tubig nga magamit sang mga mangunguma, ilabi na sa pag-atipan kag pagpadayon sang ila mga pananum sa tion sang tuman nga kainit.
Samtang, padayon man ang information dissemination sang talatapanan agud mahatagan sang nagakaigo nga impormasyon ang mga mangunguma bahin sa mga dapat kag indi dapat himuon sa pag-atipan sang ila mga pananum sa tion sang El Niño.
Paagi sa sini nga mga tikang, ginapaninguhaan sang OPA nga mapakunhod ang posible nga epekto sang sobra nga kainit kag kakulang sang tubig sa sektor sang agrikultura sa probinsya.
