Nagpaguwa sang magkasumpaki nga legal nga panan-awan ang mga eksperto sa warrant of arrest nga ginpalabas sang Quezon City Regional Trial Court batok kay Vice President Sara Duterte may kaangtanan sa kaso nga grave threats.
Suno kay ICC accredited lawyer Atty. Rameses Villagonzalo, premature, supak sa Konstitusyon kag ilegal ang warrant bangud bilang impeachable officer, ang Bise Presidente mahimo lamang ma-dismiss paagi sa impeachment process.
Apang, ginpahayag ni Atty. Dominador Lagare nga may legal nga basehan ang kaso sa idalom sang Article 282 sang Revised Penal Code ukon Grave Threats, nga gin-amendar sang Republic Act No. 10951.
Suno kay Lagare, indi dapat paghuna-hunaon nga lahog-lahog lamang ang mga pamahog sa kabuhi, ilabi na kun may kapasidad ang nagpaguwa sang pahayag nga tumanon ini.
Ginpatuhoy niya ang mga pahayag ni Duterte batok kay President Ferdinand Marcos Jr., First Lady Liza Marcos kag anay House Speaker Martin Romualdez.
Gindugang ni Lagare nga ang warrant of arrest nagapakita nga ang tanan, bisan ang pinakamataas nga opisyal sang gobyerno, sakop sang layi kag proseso sang hustisya.
