Ginpaathag ni Dr. Maria Fe Viviane S. Sespeñe, Medical Officer IV kag Focal Person sang Environmental and Occupational Health Cluster sang Department of Health SOCCSKSARGEN, ang kalainan sang PM10 kag PM2.5 particles nga yara sa haze nga naeksperyensyahan sa syudad sang Koronadal kag pila ka bahin sang rehiyon.
Sa interview sang Bombo Radyo Koronadal, ginpahayag ni Dr. Sespeñe nga mas delikado sa ikaayong lawas ang PM2.5 bangud mas magagmay ini nga partikulo nga mahimo mahaklo kag makapadugang sa irritation, kabudlayan sa pagginhawa kag pagluha sang mata.
Mahimo man ini makapalala sang kondisyon sang mga may balatian sa baga kag asthma.
Suno kay Dr. Sespeñe, wala pa sila nakabaton sang datos nga nagapakita sang pagsaka sang kaso sang amo nga mga sintomas, apang padayon ini nga ginamonitor sang ila opisina.
Bangud sini, ginapanawagan niya ang publiko nga magpatigayon sang precautionary measures, kasubong sang paglikaw anay sa pagguwa sang balay, pagsarado sang mga bintana kag pagbutang sang basa nga tela sa mga siwang agud malikawan ang pagsulod sang mga particles.
Ginarekomendar man ang pagsuksok sang N95 mask, ilabi na sa mga kinahanglan magguwa.
Gindugang ni Dr. Sespeñe nga bisan maayo pa ang air quality sa aga, mahimo ini maglala sa hapon tubtob gab-i.
Gani, ginlaygayan niya ang mga pumuluyo nga likawan anay ang mga outdoor activities sa amo nga mga panahon.
