“Patyamba-tyamba na lang ang byahe subong,”.
Ini ang ginpabutyag ni Earldern Casipe, isa ka tricycle driver, angot sa padayon nga pagsaka sang presyo sang gatong sa interview sang Bombo Radyo Koronadal.
Suno kay Casipe, mabudlay na ang ila palangabuhian subong kumpara sang una, antes nagsaka ang presyo sang gatong.
Kun may magpakyaw, dako-dako man ang ila kita, apang kun wala, mahimo nga P500 na lang ang iya kita sa bug-os nga adlaw.
Gindugang niya nga ang anay P150 nga iya ginagasto sa pagpatubil kada adlaw, nagasaka na subong sa P200 tubtob P250, kag kis-a nagakulang pa ini.
Bangud sa dyutay nga kita, naapektuhan man ang ila panginahanglanon sa pamilya.
Suno kay Casipe, kinahanglan nila nga mangin mas hugot sa pagbudget, lakip na ang pagbakal sang mas dyutay nga sud-an kag duha ka kilo lamang nga bugas para sa isa ka adlaw.
Bangud sini, nagpanawagan man si Casipe sa mga pasahero nga likawan ang pagsakay sa mga colorum nga traysikol, bangud indi lamang ini legal kundi mahimo man nga makapaluya sa kita sang mga driver nga koumpleto ang dokumento kag nagasunod sa mga kinahanglanon agud makapamasada.
Samtang, nagalaum si Casipe nga madayon kag mapatuman sang lokal nga gobyerno sang Koronadal ang ginaduso nga pagpasaka sang pamasahe agud mabuligan ang mga traysikol driver nga mabawi ang nagataas nga gastos sa ila adlaw-adlaw nga pagpamasada.
