Magahugot sang verification kag requirements sa pagkuha sang traysikol franchise ang Koronadal City Government bilang tikang batok sa colorum ukon wala otorisasyon nga operasyon sa syudad.
Sa interview sang Bombo Radyo Koronadal kay Councilor Edwin Abris, chairman sang Committee on Transportation, iya ginpahayag nga gin-amiyendahan ang franchise ordinance kag gindugangan ang mga dokumento nga kinahanglan ipakita sang mga aplikante, lakip ang pamatuod sang residency.
Ginpaklaro ni Abris nga indi na bastante ang voter’s certification bilang pamatuod sang pagkaresidente kag kinahanglan magpresentar sang National ID, utility bill ukon iban pa nga government-issued ID nga nagapakita sang adres.
Kabahin man sang bag-o nga tikang ang mas hugot nga TODA verification kag paggamit sang standardized vest ukon uniporme agud mas mahapos makilala sang traffic enforcers ang mga lehitimo nga operator.
Ginpabutyag man ni Abris nga ginadumilian ang indi otorisado nga pagbaligya ukon pagsaylo sang franchise sa iban nga tawo.
