Naghatag ang Office of the Vice President (OVP) ni Vice President Sara Duterte sang confidential funds direkta sa mga informants para ibakal sang pagkaon, bulong, lamesa, kag pulungkuan. Suno kay OVP Assistant Chief of Staff Lemuel Ortonio, indi mismo ang OVP ang nagbakal sang mga items. Sa baylo, direkta nga ginhatag ang kwarta sa mga informants ukon ahente kag ginbakal nila ang mga kinahanglanon.
Apang wala sang opisyal nga resibo para sa pila ka mga butang nga ginbakal. Suno kay Ortonio, acknowledgement receipts lang ang nabaton sang OVP. May pila man ka ngalan sa mga dokumento nga makatilingala, pareho nanday Mary Grace Piattos, Timon Andrew Pusa, kag Antonio Pagong. May pila man ka tawo nga nakabaton sang mga kantidad halin sa P50,000 tubtob P130,000. Una na nga ginpahayag sang mga opisyal sang OVP nga ang iban sini nga mga ngalan mga alyas lang ukon lain lang nga mga ngalan.
Sa karon gina-imbestigaran sang Commission on Audit (COA) ang paggamit sang confidential funds sang OVP. Lakip sa mga pamangkot sini amo ang paggamit sang makatilingala nga mga ngalan kag ang kakulang sang opisyal nga mga resibo.Wala ginpahanugotan sang COA ang P73.827 milyon nga gastos halin sa confidential funds sang OVP. Naglakip ini sang P3.5 milyon para sa mga lamesa, pulungkuan, kag mga kompyuter bangod wala sang bastante nga mga resibo kag ebidensiya nga may kaangtanan ini sa confidential informations.
Wala man gintugutan ang P69.787 milyon nga reward payments bangud kulang ang mga dokumento nga nagapamatuod nga ang mga bayad para sa madinalag-on nga mga intelligence activities.
