Ginapabaskog sang Provincial Government sang Sultan Kudarat ang mga tikang sa school safety kag anti-bullying agud malikawan ang bisan ano nga sahi sang school-related incidents.
Ginpahayag ni Sultan Kudarat Governor Datu Pax Ali ang importansya sang prevention kag temprano nga pagtumod sa mga estudyante nga may ginapang-atubang nga personal, family kag social issues ukon concerns.
Suno sa gobernador, kinahanglan mahatagan gilayon sang nagakaigo nga paggiya kag intervention ang mga estudyante nga nagakinahanglan sang bulig.
Matigdas nga ginpahayag ni Gov. Mangudadatu ang iya posisyon angot sa criminal liability sang bisan ano nga edad kun nakahimo sang mabug-at nga sala.
Samtang, padayon ang koordinasyon sang Provincial Government sang Sultan Kudarat sa nagkalain-lain nga ahensya, lakip ang Philippine National Police kag Department of Education, agud mapabaskog ang seguridad kag kaluwasan sang mga estudyante.
Ginapabaskog man ang pagbinuligay sang mga buluthuan, ginikanan kag komunidad sa pagmonitor kag pag-atubang sang mga concern nga mahimo magresulta sa school-related incidents.
Paagi sa mas hugot nga koordinasyon kag preventive measures, ginatinguhaan sang provincial government nga mapabilin nga luwas kag maayo nga palibot ang mga buluthuan para sa mga estudyante.
