Padayon ang imbestigasyon sang Koronadal City PNP sa bag-o nga social media threat nga may kaangtanan sa Koronadal National Comprehensive High School (KNCHS).
Sa interview sang Bombo Radyo Koronadal kay PLtCol. Harold Cornel, Chief of Police sang Koronadal City PNP, ginatrace pa nila ang tawo nga yara sa likod sang amo nga pamahog.
Ginpahayag ni PLtCol. Cornel nga naresolbar na sang kapulisan ang mga nagligad nga social media threats kag natumbok na ang mga persona nga nagpost sini.
Nagbisita na man ang mga opisyal sang buluthuan, kaupod ang Department of Social Welfare and Development (DSWD) kag City Social Welfare and Development Office (CSWDO), para sa nagakaigo nga intervention sa mga nalakip sa mga post.
Suno kay PLtCol. Cornel, isa sa mga kabangdanan sang pagdamo sang amo nga mga hulga amo ang pag-trending sini sa social media.
Bangud sini, gin-agda niya ang publiko nga indi mag-share ukon mag-repost sang wala mapamatud-an nga mga pamahog agud malikawan ang kahadlok kag pagkabalaka.
Samtang, ginapabilin sang Koronadal PNP ang seguridad sa palibot sang KNCHS paagi sa pagbuligay sang police personnel, school officials kag Barangay Peacekeeping Action Team (BPAT).
Nagapangayo man ang kapulisan sang bulig sa mga Parent-Teacher Associations (PTAs) sa pagpaabot sang mensahe nga “ang seguridad nagasugod sa puluy-an.”Koronadal City PNP, padayon nga nagaimbestigar sa bag-o nga social media threat sa KNCHS
