Nagpanawagan ang DepEd South Cotabato sa mga eskwelahan kag komunidad nga mangin alerto sa mga social media post nga mahimo maghatag sang peligro sa seguridad sang mga estudyante kag school personnel.
Sa interview sang Bombo Radyo Koronadal kay Ma. Teresa Hallegado, Program Coordinator sang South Cotabato Schools Division, iya ginpahayag nga indi dapat hulaton ang aktuwal nga insidente antes magpatuman sang mga tikang para sa seguridad.
Ini matapos ang threat nga nagluntad sa Tampakan National High School, nga nagtulod sa buluthuan nga magpatuman sang preventive measures, lakip ang temporaryo nga pagsuspende sang klase.
Suno kay Hallegado, importante ang gilayon nga pagreport sang mga makaduluda sa social media posts ukon impormasyon agud malikawan ang posible nga peligro.
Bisan pa suspendido ang face-to-face classes, ginpasiguro sang DepEd nga mahimo magpadayon ang pagtuon paagi sa online, distance ukon modular learning kun kinahanglan.
Ginpahayag man nga wala sang general suspension sang klase sa bilog nga South Cotabato bangud sa heat index, sa baylo nga preventive measure lamang ini nga may kaangtanan sa insidente sa Tampakan National High School.
