Mas ginpabaskog sang Tampakan LGU ang pagmonitor kag intervention sa mga estudyante nga posible may ginatubang nga emosyonal ukon personal nga problema matapos ang social media threat sa Tampakan National High School.
Sa interview sang Bombo Radyo Koronadal kay Tampakan Mayor Leonard Escobillo, iya ginpahayag nga ginakoordinar na sang lokal nga panguluhan kag mga manunudlo ang pagkilala sa mga kabataan nga nagapakita sang indikasyon sang kaakig ukon negatibo nga sentimyento.
Suno sa alkalde, ang mga estudyante nga kinahanglan sang dugang nga pagtalupangod ginapadal-an kaupod ang ila mga ginikanan sa counseling kag ginarefer sa Municipal Social Welfare and Development Office ukon MSWDO.
Gindugang ni Mayor Escobillo nga importante ang amo nga intervention agud indi lamang maresolbar ang seguridad nga aspeto sang insidente, sa baylo mahatagan man sang insakto nga bulig ang mga kabataan nga posible may personal nga ginatubang.
Nagpanawagan man ang alkalde sa mga ginikanan nga mangin mas aktibo sa pagmonitor kag paggiya sa ila mga kabataan samtang nagapadayon ang imbestigasyon sa social media threat.
