Ginatipon na sang mga otoridad ang mga ngalan sang mga estudyante sa Tampakan National High School nga ginakabig nga posible may negatibo nga sentimyento ukon kaakig kasunod sang social media threat sa nasambit nga buluthuan.
Sa exclusive interview sang Bombo Radyo Koronadal kay Tampakan Mayor Leonard Escobillo, iya ginpahayag nga nakig-angot na ini sa mga manunudlo agud mahibaluan kun sin-o ang mga estudyante nga nakitaan sang hateful words, aksyon ukon comments antes nagluntad ang insidente.
Ginpahayag sang alkalde nga posible may nag-trigger sa ginalegar nga aksyon sang isa ka indibidwal ukon estudyante antes gin-post ang threat sa social media.
Ang mga estudyante nga ginakabig nga kinahanglan sang pagtalupangod ang ginapatawag kaupod ang ila mga ginikanan angot sa pag-istoryahanay kag counseling.
Epektibo naman sila gin-endorso sa Municipal Social Welfare and Development Office (MSWDO) angot sa dugang nga suporta kag bulig.
Suno kay Mayor Escobillo, ini nga tikang indi lang agud mahibaluan ang responsable sa insidente kundi agud man mabuligan ang mga kabataan nga posible may personal ukon emosyonal nga problema.
Ginpahinumdom man niya ang mga ginikanan kag publiko nga indi magdali sa pagtudlo sang basulon samtang nagapadayon ang imbestigasyon.
Suno sa alkalde, may tagsa-tagsa nga sitwasyon kag kabudlayan ang mga kabataan nga nagakinahanglan sang giya, disiplina kag paghangop.
Sa karon, padayon man ang koordinasyon sang LGU, mga manunudlo kag mga otoridad agod mapabaskog ang seguridad kag masiguro ang kaayuhan sang mga estudyante sa Tampakan National High School.
