Ginhatagan ligwa sang DepEd South Cotabato ang mas hugot nga koordinasyon sang mga buluthuan, ginikanan, LGUs, PNP kag iban pa nga stakeholders para mapabaskog ang seguridad sang mga estudyante kag personnel kasunod sang shooting incident sa Ateneo de Zamboanga University Junior High School.
Sa exclusive interview sang Bombo Radyo Koronadal kay Program Coordinator Ma. Teresa Hallegado, sang South Cotabato Schools Division, importante ang pagbinuligay sang tanan nga sektor agud malikawan ang mga insidente nga mahimo magpameligro sa mga learners.
Ginpahayag ni Hallegado nga isa sa mga hangkat ang kakulangan sang security personnel, ilabi na sa mga buluthuan nga madamo ang estudyante.
Padayon man ang DepEd sa information drive nahanungod sa Child Protection Policy kag anti-bullying, upod ang paghatag sang mental health kag guidance services sa mga estudyante.
Suno kay Hallegado, may mga guidance coordinators sa tagsa ka buluthuan nga ginhanas sa pag-atubang sang mga kaso, apang kinahanglan gihapon ang propesyonal nga guidance counselors para sa mas komplikado nga mga sitwasyon.
Ginpabutyag man niya nga daku ang bulig sang Provincial Government, barangay tanod kag PNP sa pagpalig-on sang seguridad sa mga buluthuan.
Suno kay Hallegado, ang school safety indi lang responsibilidad sang eskwelahan kundi isa ka kolektibong responsibilidad sang pamilya, komunidad kag mga partner agencies.
