Nagapabilin nga wala sang namonitor ang mga katapo sang Armed Forces of the Philippines (AFP) nga mga Private Armed Group (PAGs) nga posible nga magamit sang mga kandidato sa bahin sang Bangsamoro Autonomous Region in Muslim Mindanao (BARMM) agud nga usaron ang mga ini sa pagpanghadlok kag pagpanabotahe sa mga kontra san mga ini sa nagahilapit nga Bangsamoro Parliamantery Elections sa masunod nga bulang sang Setyembre.
Ini ang ginpasiguro ni LTC. Roland Suscano- Tigpamaba sang 6ID Philippine Army kag Joint Task Force Central sa interview sang Bombo Radyo Koronadal. Suno kay Suscano,nagapabilin nga malinong ang lugar sa diin gindeploy ang mga militar kag wala sang mga presensiya sang Private Armed Groups nga mahimo mausar sang mga kandidato bangud man sa wala puas nga operasyon sang AFP batok sa mga lawless elements kag wala naman sang ikasarang ang mga Terrorist groups nga magpatigayon sang mga atrosidad nga maka-apekto sa eleksyon.
Dugang pa sini, wala man sang nakita nga problema ang security personnels sa mga kandidato bangud man sa mga ginapatigayon nga peace covenants kag peace dialogues sa tunga sang mga magkasumpong nga mga kandiadato sa tanan nga posisyon. Nagapabilin naman nga hugot ang ginapatigayon nga checkpoint operations sang mga militar sa mga kritikal areas agud nga masiguro nga naga pabilin ang kalinong kag katawhay sang eleksyon asta matapos ini kag makapungko ang mga magdalaog.
