Ginkumpirmar sang Special Disbursing Officer ukon SDO sang Office of the Vice President nga si Gina Acosta nga si Vice President Sara Duterte ang nagmando nga i-release kay Col. Raymond Dante Lachica ang P125 milyon nga confidential funds sang Disyembre 2022.
Sa pagaatubang ni Acosta bilang hostile witness sa Senate Impeachment Court, ginmentionar niya nga personal niya nga gin-encash ang P125-milyon nga tseke sang December 20, 2022, kag ginmando sa kanya ni Duterte nga ihatag ang bug-os nga balor kay Lachica, nga nagaserbi sang tion nga ato bilang commanding officer sang Vice Presidential Security and Protection Group (VPSPG) kag gin-appoint nga security officer sang OVP.
Suno kay Acosta, si Lachica ang may ihibalo kag eksperto sa pagpatuman sang confidential operations bangud sa iya access sa national security information.
Apang, aminado si Acosta nga bilang SDO, siya mismo ang may responsibilidad sa pag-disburse sang confidential funds.
Sang ginpamangkot ni Senate Impeachment Court Presiding Officer Francis “Chiz” Escudero kun sakop sang katungdanan sang security officer ang paggasto sang confidential funds, ginpahayag ni Acosta nga indi ini trabaho ni Lachica sa baylo sang disbursing officer.
Ginkumpirmar man ni Acosta nga wala sang probisyon sa Joint Circular 2015-01 nga nagamentionar nga mahimo mag-disburse sang confidential funds ang isa ka security officer.
Matapos gin-release ang P125 milyon kay Lachica, ginpahayag ni Acosta nga nagsumiter ini sang utilization reports kag nag-liquidate sang pondo.
Ang OVP sang kabug-usan nga P500 milyon nga confidential sang 2022 kag 2023, samtang P112.5 milyon ang nakadto sa DepEd, gani naglab-ot ini sa P612.5 milyon ang pondo.
