Ginpahayag sang broadcaster nga Korina Sanchez nga indi na interesado ang iya bana nga si anay senador kag anay Department of Interior Local Government Secretary Mar Roxas nga magbalik sa pagserbisyo sa gobyerno ukon magpangita liwat sang posisyon sa politika.
Ginpahayag ni Sanchez nga may mga nagatanyag kay Roxas nga mangin talk show host, apang indi na ini luyag sang anay senador.
Gindayaw man ni Sanchez ang mas hipos nga kabuhi ni Roxas subong, nga malayo sa spotlight.
Suno sa iya, madamo na sang mga layi kag reporma nga nahimo kag naipasa sang iya bana sang yara pa ini sa gobyerno.
Ginpahayag man ni Sanchez nga may mga nagatanyag kay Roxas sang mga posisyon sa administrasyon ni Presidente Ferdinand “Bongbong” Marcos Jr., apang indi niya mapamatud-an ang espesipiko nga mga posisyon.
Suno kay Sanchez, indi na luyag ni Roxas nga magbalik sa politika, bisan pa nga ginaulikid man sini ang pag-uswag sang administrasyon.
Samtang, ginpahayag ni Sanchez nga dugay na niya ginahunahuna ang pagsulod sa politika.
Apang suno sa iya, madamo nga beses nga napunggan ang iya plano kag posible nga matabo ini liwat subong.
